Parc Coedwig Afan – Rhyslyn, ger Port Talbot

Croeso

Mae Rhyslyn ym Mharc Coedwig Afan.

Mae o fewn pellter cerdded i bentref Pont-rhyd-y-fen.

Mae dau lwybr cerdded ag arwyddbyst yma a dewis o lwybrau beicio mynydd.

Mae'r ardal bicnic wrth ymyl y maes parcio.

Llwybrau cerdded

Mae arwyddbyst ar y llwybrau cerdded o’r dechrau i’r diwedd.

Chwiliwch am y panel gwybodaeth ar ddechrau’r llwybr.

Dysgwch beth yw ystyr graddau’r llwybrau cerdded.

Llwybr Glan-yr-Afon Rhyslyn

• Gradd: Hawdd
• Pellter: 1.1 milltir/1.8 cilomedr
• Amser: 45 muned
• Dringo: 197 troedfedd/60 metr

Dilynwch Afon Afan i fyny'r afon at olygfan a dychwelyd ar hyd trac rheilffordd mwyngloddio segur.

Mae hwn yn llwybr gwastad bron yr holl ffordd ar hyd llwybrau glan yr afon ac ar ffyrdd coedwig.

Cadwch lygad am feicwyr ar rannau o'r daith gerdded.

Llwybr Penrhys

• Gradd: Cymedrol
• Pellter: 3.6 milltir/5.7 cilomedr
• Amser: 2 awr
• Dringo: 856 troedfedd/261metr

Mwynhewch olygfeydd panoramig ar hyd y gefnffordd hynafol a gysylltai eglwys Baglan ar yr arfordir â Chraig y Llyn i'r gogledd o Lyncorrwg.

Gallwch weld yr holl ffordd i Fannau Sir Gâr ar ddiwrnod clir.

Llwybrau beicio mynydd

Mae arwyddbyst i’w cael ar bob un o’n llwybrau beicio mynydd o’r dechrau i’r diwedd ac maent wedi’u graddio’n ôl eu hanhawster.

Ceir panel gwybodaeth ar ddechrau’r llwybr – dylech ei ddarllen cyn cychwyn ar eich taith.

• Darganfod ystyr graddau llwybrau beicio mynydd.
• I gael rhestr ein llwybrau beicio mynydd a gwybodaeth er mwyn cynllunio eich taith feicio, ewch i feicio mynydd.
• I gael rhagor o wybodaeth am feicio mynydd yng Nghymru, ewch i wefan Mountain Bike Wales.

Beiciwr Newydd (Gwyrdd) a Pharc Sgiliau

• Gradd: Gwyrdd (Hawdd)
• Pellwch: 6 cilometr
• Dringo: 145 metr
• Amser: 30 muned – 2 awr

Mae'r llwybr hwn sydd wedi'i raddio'n wyrdd yn llwybr cyffrous a throellog.

Mae'n llwybr perffaith fel man cychwyn i newydd-ddyfodiaid, gyda llwybr llydan a disgynfeydd gweddol eang.

Mae Parc Sgiliau ar y llwybr sy'n cynnig cyfle i feicwyr ddatblygu eu galluoedd beicio technegol hefyd.

Gellir dod o hyd i ardaloedd picnic ar hyd y llwybr.

Gwybodaeth hygyrchedd

Mae’r llwybr hwn yn addas ar gyfer pobl sy'n defnyddio offer addasol.

Mae offer addasol yn cynnwys beiciau addasol, cadeiriau olwyn addasol a sgwteri symudedd.

Rydym wedi cynhyrchu ffilm i'ch helpu i ganfod pa mor addas i chi y gallai fod cyn i chi ymweld.

I wylio’r ffilm ewch i’r dudalen Llwybrau ar gyfer defnyddwyr offer addasol

Beiciwr Newydd (Glas)

• Gradd: Glas (Cymedrol)
• Pellwch: 2.4 cilometr
• Dringo: 94 metr
• Amser: 45 muned – 1 awr

Dyma lwybr gradd glas sy’n rhoi blas o beth sydd i ddod i’r rhai hynny sy’n dymuno symud ymlaen.

Wrth fynd i lawr tuag at Afon Afan mae’r ddolen yn datgelu rhai mannau cudd.

Gellir dod o hyd i ardaloedd picnic ar hyd y llwybr.

Llwybr Seiclo'r Rheilffordd

• Gradd: Gwyrdd (Hawdd)
• Pellter: 14.7 cilometr
• Dringo: 266 metres
• Amser: 1½ - 2 awr
• Mannau cychwyn amgen: Maes parcio Rhyslyn a Chanolfan Beicio Mynydd Glyncorrwg
• Gwybodaeth am y llwybr: Mae'r llwybr hwn yn cynnwys mynediad ar hyd ffordd gyhoeddus heb unrhyw balmant neu lwybr seiclo ar wahân ar gael.

Mae’r llwybr rhwydd hwn yn dilyn llwybr llydan a gwastad yr hen reilffordd a oedd unwaith yn cludo teithwyr a glo ar hyd y cwm.

Mae dros 14 milltir o hen reilffordd segur a ffordd goedwig yn cysylltu cymunedau Pont-rhyd-y-fen a Glyncorrwg – ffordd wych o ddod i adnabod Cwm Afan.

Y Wal

• Gradd: Coch (Anodd)
• Pellter: 18.7 cilometr
• Amser: 1½-3 awr
• Esgyniad: 746 metr
• Mannau cychwyn amgen: Canolfan Ymwelwyr Parc Coedwig Afan a Gyfylchi

Gyda rhai o'r disgynfeydd trac sengl gorau yn y DU, mae'r llwybr hwn yn croesi ochr ogleddol Cwm Afan.

Mae'n amrywio o fod yn gyflym ac agored i fod yn dynn, technegol a gwreiddiog.

Mae golygfeydd gwych o'r dyffryn a'r arfordir yn ymddangos ar wahanol adegau, ac mewn mannau gall y llethrau serth deimlo'n agored.

Am daith hirach, cyfunwch hwn â Llwybr White’s Level drwy un o’r cysylltiadau W2.

Am daith hirach, cyfunwch â Llwybr White’s Level drwy un o’r cysylltiadau W2 - gweler Canolfan Ymwelwyr Parc Coedwig Afan.

Llwybr Man Geni Richard Burton

Mae maes parcio Rhyslyn o fewn pellter cerdded hawdd i bentref Pont-rhyd-y-fen lle ganwyd yr actor enwog Richard Burton.

Mae Llwybr Man Geni Richard Burton yn cychwyn o'r maes parcio ac yn mynd i Bont-rhyd-y-fen a'i fan geni.

Mae paneli gwybodaeth ar hyd y llwybr gyda ffeithiau diddorol am ei blentyndod a'i yrfa.

I gael rhagor o wybodaeth, ewch i wefan Darganfod Castell-nedd Port Talbot.

Parc Coedwig Afan

Mae Rhyslyn ym Mharc Coedwig Afan.

Mae Parc Coedwig Afan yn un o gyrchfannau beicio mynydd eiconig Prydain ac yn lle poblogaidd ar gyfer cerdded.

Mae'r parc coedwig wedi'i leoli yng Nghwm Afan ychydig filltiroedd o'r M4, lle arferai glo gael ei gloddio, a gallwch ddarganfod rhai o nodweddion treftadaeth y dyffryn ar hyd ein llwybrau.

Archwiliwch Barc Coedwig Afan o'r meysydd parcio hyn:

• Canolfan Ymwelwyr Parc Coedwig Afan – prif fan cychwyn ar gyfer llwybrau beicio mynydd a cherdded ym Mharc Coedwig Afan
• Gyfylchi – llwybrau cerdded a pharc sgiliau ar gyfer beicwyr mynydd
• Canolfan Beicio Mynydd Glyncorrwg – man cychwyn ar gyfer llwybrau beicio mynydd ag arwyddbyst

Ymweld yn ddiogel

Rydyn ni eich eisiau chi i ddychwelyd adref yn ddiogel ar ôl eich ymweliad yma.

Rydych yn gyfrifol am eich diogelwch eich hun yn ogystal â diogelwch unrhyw blant ac anifeiliaid sydd gyda chi yn ystod eich ymweliad.

Am gyngor ac awgrymiadau i'ch helpu i gynllunio'ch ymweliad, ewch i dudalen Ymweld â'n lleoedd yn ddiogel.

Newidiadau i gyfleusterau ymwelwyr

Gweler brig y dudalen we hon i gael manylion unrhyw gynlluniau i gau cyfleusterau neu unrhyw newidiadau eraill i gyfleusterau ymwelwyr yma.

Er mwyn eich diogelwch, dilynwch gyfarwyddiadau'r staff ac arwyddion bob amser gan gynnwys y rhai ar gyfer dargyfeirio neu gau llwybrau.

Mae'n bosibl y bydd angen i ni ddargyfeirio neu gau llwybrau wrth i ni wneud gwaith cynnal a chadw neu gynnal gweithrediadau eraill ac mae'n bosibl y bydd angen i ni gau cyfleusterau ymwelwyr eraill dros dro.

Mewn tywydd eithafol, mae'n bosibl y byddwn yn cau cyfleusterau ar fyr rybudd oherwydd y risg o anafiadau i ymwelwyr a staff.

Trefnu digwyddiad ar ein tir

Efallai y bydd angen caniatâd gennym ni i drefnu digwyddiad neu gynnal rhai gweithgareddau ar ein tir.

Gwiriwch a gewch chi ddefnyddio tir rydyn ni’n ei reoli.

Sut i gyrraedd yma

Rydym yn argymell eich bod yn dilyn y cyfarwyddiadau hyn neu’n defnyddio’r map Google isod lle mae pin yn nodi’r lleoliad.

Mae Rhyslyn 4 milltir i'r gogledd ddwyrain o Bort Talbot.

Gadewch yr M4 yng nghyffordd 40 (Port Talbot) a dilynwch yr arwyddion i’r A4107 i gyfeiriad y Cymer.

Dilynwch yr arwyddion brown a gwyn ar gyfer Parc Coedwig Afan o'r gylchfan ar ôl gadael y draffordd.

Ar ôl tair milltir a hanner, trowch i'r chwith gan gymryd y B4287 tuag at Bontrhydyfen.

Ewch dros bont ac, wrth i'r ffordd droi tua’r chwith, cymerwch dro sydyn i'r dde i fynd ar y trac.

Dilynwch y trac hwnnw am 350 metr i gyrraedd maes parcio Rhyslyn.

Y cyfeirnod grid Arolwg Ordnans ar gyfer y maes parcio yw SS 800 942 (Explorer Map 165 neu 166).

Y cod post yw SA12 9SG. Sylwer bod y cod post hwn yn cwmpasu ardal eang ac ni fydd yn mynd â chi yn uniongyrchol i’r fynedfa.

Mae Llwybr Rhwydwaith Beicio Cenedlaethol Sustrans 887 yn mynd i Barc Coedwig Afan. I gael rhagor o wybodaeth ewch i wefan Sustrans.

Edrychwch ar y lle hwn ar wefan What3Words.

Cludiant cyhoeddus

Y prif orsaf reilffordd agosaf yw Port Talbot.

Er mwyn cael manylion ynghylch cludiant cyhoeddus, ewch i wefan Traveline Cymru.

Parcio

Mae’r maes parcio yn rhad ac am ddim.

Ni chaniateir parcio dros nos.

Manylion cyswllt

Nid oes staff yn y lleoliad hwn.

Cysylltwch â’n tîm cwsmeriaid gydag unrhyw ymholiadau cyffredinol yn ystod oriau swyddfa o ddydd Llun i ddydd Gwener.