Trwyddedu morol yng Nghymru

Efallai y bydd angen trwydded forol arnoch os ydych chi’n bwriadu cynnal gwaith yn yr ardal drwyddedadwy forol.

Mae trwyddedu morol yn amddiffyn yr amgylchedd a defnyddwyr môr eraill wrth ganiatáu gwaith datblygu.

Pwy all wneud cais

Gall trwyddedau morol fod ar gyfer:

  • unigolion
  • sefydliadau
  • cyrff cyhoeddus, fel cynghorau lleol

Chi sy’n gyfrifol am sicrhau bod gennych y caniatâd cywir cyn i chi ddechrau ar y gwaith.

Gweithgareddau a allai fod angen trwydded ar eu cyfer

Efallai y bydd angen trwydded forol arnoch ar gyfer gweithgareddau yn yr ardal drwyddedadwy forol.

Gall hyn gynnwys y canlynol:

  • gwaith adeiladu
  • carthu
  • dyddodi deunyddiau
  • tynnu deunyddiau
  • gosod ceblau neu biblinellau

Dysgwch fwy am weithgareddau sydd angen trwydded forol.

Gweithgareddau nad oes angen trwydded ar eu cyfer

Nid oes angen trwydded forol ar gyfer rhai gweithgareddau y byddai fel arfer angen un ar eu cyfer os ydynt yn bodloni gofynion penodol.

Dysgwch fwy am weithgareddau sydd wedi’u heithrio rhag trwyddedu morol.

Y gwahanol fathau o drwyddedau

Mae tri math o drwydded forol:

  • Band 1
  • Band 2
  • Band 3

Bydd angen i chi wneud cais am ba bynnag fand sy’n addas ar gyfer eich gweithgaredd.

Taliadau

Rhaid i chi dalu ffi pan fyddwch chi’n gwneud cais am drwydded forol.

Mae’r swm rydych chi’n ei dalu yn dibynnu ar y band.

Mae band 1 a band 2 yn daliadau cyfradd sefydlog.

Codir tâl fesul awr am geisiadau band 3.

Dysgwch fwy am daliadau.

Camau trwyddedu morol

1. Gwiriwch a oes angen trwydded arnoch a pha drwydded sydd ei hangen arnoch

Cadarnhewch a oes angen trwydded ar gyfer eich gweithgaredd a pha fand sy’n berthnasol.

2. Paratowch eich cais

Ceisiwch gyngor cyn ymgeisio gennym ni neu gan sefydliadau eraill, paratowch unrhyw ddogfennau ategol, a chwblhewch y cais.

3. Cyflwynwch a thalwch am eich cais

Yna bydd eich cais yn cael ei wirio i wneud yn siŵr ei fod yn cynnwys yr holl wybodaeth sydd ei hangen arnom i ddechrau ein hasesiad. Enw hyn yw ‘wedi’i wneud yn briodol’.

4. Ymgynghori ac asesu

Efallai y byddwn yn ymgynghori â sefydliadau eraill a’r cyhoedd i’n helpu i asesu unrhyw effeithiau o ganlyniad i’ch prosiect. Efallai y byddwn hefyd yn cysylltu â chi am ragor o wybodaeth.

5. Penderfyniad

Byddwn yn rhoi neu’n gwrthod trwydded.

Gwiriadau cais

Ar gyfer rhai ceisiadau band 2 a 3, efallai y byddwn yn cynnal gwiriad cyn-asesu o’r enw ‘gwiriad addasrwydd’.

Dyma adolygiad cynnar o’ch dull arfaethedig. Mae’n helpu i nodi bylchau cyn i ni asesu eich cais yn ffurfiol.

Gall hyn leihau oedi wrth asesu yn ddiweddarach.

Mae gwiriad addasrwydd yn debygol ar gyfer prosiectau lle mae’r canlynol yn berthnasol:

  • mae angen asesiad o’r effaith amgylcheddol
  • maent yn ddatblygiadau seilwaith mawr (band 3)
  • maent yn defnyddio technolegau neu ddulliau newydd (band 2 neu 3)
  • maent yn cynnwys dyframaeth
  • gallent effeithio ar ddefnyddwyr môr eraill
  • maent mewn ardaloedd sensitif

Byddwn yn ymgynghori â nifer fach o sefydliadau allweddol i wirio’r canlynol:

  • yr wybodaeth rydych chi’n ei darparu
  • data ac arolygon
  • dulliau asesu

Mae gwiriad addasrwydd fel arfer yn cymryd rhwng pedair ac wyth wythnos. Dylech ystyried hyn yn amseriadau eich cais.

Os oes angen gwiriad addasrwydd, byddwn yn cysylltu â chi i egluro beth sydd ei angen a beth sy’n digwydd nesaf.

Mewn rhai achosion, yn dilyn gwiriad addasrwydd, efallai y byddwn yn dychwelyd y cais. Gallen ni ofyn i chi wneud cais eto os nad yw’n cynnwys yr holl wybodaeth sydd ei hangen arnom i’w asesu.

Amseroedd asesu band 1 a 2

Mae pa mor hir y mae’n ei gymryd i asesu eich cais yn dibynnu ar ba drwydded band sydd ei hangen arnoch a pha mor gymhleth yw’r gweithgaredd.

Band 1: Chwe wythnos

Band 2: 18 wythnos

Mae’r amserlenni hyn yn dechrau o’r adeg y byddwn yn cadarnhau bod eich cais wedi’i gwblhau ac yn barod i’w asesu. Efallai na fydd yn dechrau o’r dyddiad y byddwch yn ei gyflwyno.

Amseroedd asesu band 3

Gall ceisiadau band 3 fod yn wahanol iawn o ran pa mor gymhleth ydynt. Mae pa mor hir y mae’n ei gymryd i asesu cais yn dibynnu ar fath a maint y prosiect.

Mae’r tabl isod yn dangos yr amseroedd penderfynu byrraf, hiraf a chyfartalog ar gyfer gwahanol fathau o brosiectau band 3.

Math o brosiect band 3 Yr amser byrraf a gymerir Yr amser hiraf a gymerir Yr amser cyfartalog a gymerir
Cynlluniau amddiffyn arfordirol 4 mis 1 flwyddyn 6 mis 10 mis
Ehangu porthladdoedd 1 flwyddyn 2 flwyddyn 1 mis 1 flwyddyn 6 mis
Ynni adnewyddadwy ar y môr 1 flwyddyn 1 mis 1 flwyddyn 5 mis 1 flwyddyn 3 mis
Prosiectau eraill sydd angen asesiad o’r effaith amgylcheddol 11 mis 1 flwyddyn 3 mis 1 flwyddyn 1 mis
Prosiectau eraill nad oes angen asesiad o’r effaith amgylcheddol arnynt 1 mis 9 mis 4 mis


Os byddwn angen mwy o wybodaeth gennych chi, bydd eich cais yn cael ei ohirio, a fydd yn cynyddu’r amser a gymerir i gyrraedd penderfyniad.

Os cewch drwydded

Bydd eich trwydded forol yn cynnwys y canlynol:

  • disgrifiad o’r gwaith y caniateir i chi ei wneud
  • unrhyw amodau y mae’n rhaid i chi eu dilyn
  • cadarnhad o pryd mae’r drwydded yn dechrau ac yn gorffen

Mae hyd trwydded yn dibynnu ar y gweithgaredd a’i faint. Ni all trwyddedau band 1 fod yn hirach na blwyddyn.

Os bydd eich gwaith arfaethedig yn newid, efallai y bydd angen i chi wneud cais i amrywio'ch trwydded. Ni allwch amrywio trwydded band 1.

Caniatadau eraill y gellir fod eu hangen arnoch

Efallai y bydd angen trwyddedau, caniatadau neu gydsyniadau eraill arnoch cyn i chi ddechrau gweithio. Nid yw trwydded forol yn disodli’r rhain.

Caniatadau eraill gennym ni

Efallai y bydd angen:

Caniatadau gan sefydliadau eraill

Efallai y bydd angen i chi hefyd gael y canlynol:

  • caniatâd cynllunio gan eich awdurdod cynllunio lleol
  • caniatâd gan dirfeddiannwr, fel Ystad y Goron

Nid yw hon yn rhestr gyflawn. Chi sy’n gyfrifol am sicrhau bod gennych yr holl ganiatadau sydd eu hangen arnoch gennym ni a sefydliadau eraill cyn i chi ddechrau unrhyw waith.

Diweddarwyd ddiwethaf